"XX asr oʻzbek adabiyotida oʻz oʻrni va uslubiga ega boʻlgan adib – Oʻzbekiston xalq yozuvchisi Oʻtkir Hoshimov, aytish mumkinki, XXI asr oʻquvchisining ham sevimli adibi boʻlib qoladi. Jonli va hayotiy tasvirlar, sof oʻzbekona yondashuv va xarakter, qahramonlar oʻrtasidagi suhbatlar mutolaasi oʻquvchini oʻz taʼsiriga oladi. Nafaqat millat, balki chin insoniylik tarannumi yozuvchi asarlarida yetakchilik qilishi kitobxon uchun tarbiyaviy va hayotiy saboq boʻladi. Xoh jiddiy, xoh hajviy boʻlsin Oʻtkir Hoshimov asarlarida hayot qaynaydi: unda har birimiz oʻzimizni, oilamizni, doʻst-u yorimizni, hatto hech kimga oʻxshamagan onamizni koʻramiz... Bir inson umrini qamragan roman boʻlsin, qator novellalardan iborat qissa yoki hikoya boʻlsin, janridan qatʼi nazar, Oʻtkir Hoshimov asarlarida dunyoning ishlari mujassam. Mutolaa har qanday oʻquvchi uchun katta hayotiy xulosa berishiga ishonamiz."