Naturalizm adabiyotining yoʻlboshchisi Emil Zolya yer yuziga haqiqat urugʻini sochgan atoqli fransuz yozuvchisi edi. Uning ʻʻHamal” asari adibni dunyoga tanitgan ijod namunalaridan boʻlib, roman yerosti zulmatlarida mashaqqatli mehnat qilib ham qorni nonga toʻymagan zahmatkashlarning ayanchli taqdiridan hikoya qiladi. Asriy mehnat, ochlik, qashshoqlik va hukmron toifa adolatsizligidan azob chekkan ajdodlar naslining tenglik uchun kurashib yengilishi va yorugʻ kelajakka umid bilan yana shu kurash orzusida yashay boshlashi oʻquvchini hayratga soladi. Asarda shaxtyorlar ogʻriqlari va sabot-matonati voqealar asosida haqqoniy ochib berilgan.