Aleksandr Isayevich Soljenitsin asarlari nafaqat rus adabiyotida, balki jahon adabiyotining noyob durdonalari sifatida eʼtirof etiladi. Adibga adabiyot boʻyicha nufuzli Nobel mukofoti topshirilgani ham bejiz emas. Muallifning qay bir asarini oʻqimang, xoh hikoya, xoh qissa, xoh roman boʻladimi, mutolaa jarayonida hayrat ummoniga shoʻngʻiganingizni, uning qahramonlari bilan hamnafas boʻlganingizni bilmay qolasiz. Zotan, adibning asarlari qanchalik murakkab boʻlmasin, muallif goʻzallikni – soddalik, samimiylik, insoniylikda koʻradi, inson erki va qadri, adolat, insonlararo munosabatlar, eʼtiqod, ezgulikni tarannum etadi.