Marsga hujum

"Amerikaning mashhur fantast yozuvchisi Rey Bredberining nomi va asarlari oʻzbek oʻquvchilariga ham yaxshi tanish. Endi adibning shoh asari “Marsga hujum”ni siz aziz fantastika ixlosmandlariga havola etmoqdamiz. Oltmish yoshida ilk marta uchoqqa chiqqan, uyida eski yozuv mashinkasidan boshqa bironta zamonaviy texnika uskunasi boʻlmagan Rey Bredberi favqulodda quvvayi zehni bilan olis-olis galaktikalarga xuddi fazogirlarday “sayohat” qiladi va moʻjizaviy taassurotlarini jahon ahli bilan baham koʻradi. Muallifning fantastika vositasida bunday gʻaroyib “sayohat”lari zamirida ulkan majoziy maʼno yotadi – u Yerdagi hayot, xususan, ona tabiatga munosabat allaqachon izdan chiqqanligini alam, oʻkinch va zaharxandalik bilan ifoda etadi. Hatto biz shaffof marsliklar istiqomat qiladi deb tasavvur etganimiz Mars sayyorasining ham mana shu odamlar allaqachon boshiga yetib boʻlganini alohida uqtiradi. Bu esa Yerdagi har bir odamni chuqurroq oʻylashga, hushyor boʻlishga daʼvat etadi."