Senyor Prezident

"Migel Anxel Asturias (1899 – 1974) gvatemalik yozuvchi, Nobel mukofoti laureati, Yangi Lotin Amerikasi adabiyotining asoschilaridan biri hisoblanadi. Adib milliy mustaqillik gʻoyalarining faol targʻibotchisi sifatida katta shuhrat qozongan. Uning “Gvatemala afsonalari”, “Makkajoʻxori odamlari”, “Dovul”, “Marhumlarning koʻzlari” romanlari butun dunyoga mashhur. Doimo haqiqatni yozgan hur fikrli adib qattiq taʼqiblar ostida yashaydi: uni Vatanidan quvgʻin qiladilar, kitoblari, qoʻlyozmalarini yondiradilar, ammo adibning mustahkam irodasini buka olmaydilar. 1946-yilda eʼlon qilingan “Senyor Prezident” romani ham jahondagi juda koʻp tillarga tarjima qilingan. Unda mustabid tuzum hukmronligi va zoʻravonlikdan aziyat chekkan butun bir xalqning fojiali hayoti katta mahorat bilan yoritib berilgan. Oʻz hukmronligini fuqarolarning yuragiga vahima va qoʻrquv solish orqali oʻrnatgan zoʻravon hukmdor hamda yugurdaklarning insoniylikka zid tubanlik qiyofasi asarda yorqin badiiy boʻyoqlarda koʻrsatiladi. Muallif boshqa asarlari kabi bu romanida ham Xalq ogʻzaki ijodi va mifologiyasiga xos anʼanalarni realistik tasvirlar bilan omuxta qila olgan. Shu tufayli asar katta qiziqish, zavq va hayajon bilan oʻqiladi."