Teatr

Mashhur ingliz adibi Somerset Moemning koʻplab tillarga tarjima qilingan mashhur “Teatr” romani nafaqat XX asr birinchi choragidagi ingliz jamiyatining haqqoniy qiyofasini ifodalagani bilan e’tiborli, balki inson qalbidagi turfa hissiyotlarni oʻta jozibali va ishonarli tarzda, yuksak badiiy til, musavvirona tashbehlar, falsafiy mulohaza va mushohadalar vositasida tasvirlashi bilan ham kitobxonlarga manzur boʻlib kelmoqda. Xususan, mazkur asarda inson ruhiyatining chuqur bilimdoni boʻlmish muallif tomonidan hayotiy voqea-hodisalarning teran tahlili orqali chiqarilgan xulosalar barcha yoshdagi kitobxonlar uchun ishq-muhabbat, oila va unga sadoqat, otalik va onalik mas’uliyati haqida saboq berib, burch va vijdon, inson sha’ni va qadri, hayotiy maslaklari kabi qadriyatlarni oyoqosti qilishning mash’um oqibatlaridan ogoh etishi bilan dolzarb ahamiyat kasb etadi. Darhaqiqat, asarning “Teatr” deb atalishi ham bejiz emas, zero, bir paytlar buyuk ingliz dramaturgi Vilyam Shekspir: “Bu hayotning oʻzi teatr, undagi barcha odamlar aktyorlardir”, degan edi. Ana shu ma’noda mazkur asar har bir kishini hayot deb atalmish ulkan sahnada oʻz rolini inson degan yuksak martaba va maqomga munosib ijro etishga, halol va pok yashab oʻtishga chorlaydi.