Mazkur roman insonga oʻz maʼnaviyatidagi qudratli kuchni anglatishi, mudroq yurakni uygʻotishi, mayda manfaatlar va manfur tuygʻulardan asranishga chorlashi, qoʻrquv hissini barbod etishi jihatidan ham ahamiyatlidir. Zotan, insonlik sharafi ham fitratimizda kechuvchi azaliy muhorabada matonat koʻrsatib gʻolib kelish, oʻzligimizni toʻla namoyon eta olishda oʻz aksini topadi. Muallif gʻoyibdan taralayotgan, xuddi yoʻl kabi uzun, sirli va sehrli ovoz shivirlariga dil qulogʻini tutadi.