Abdulla Avloniy – Milliy uygʻonish davri oʻzbek adabiyotining yirik vakili. Bu davr adabiyotining biror-bir qirrasi yoʻqki, Avloniy ijodida boʻy koʻrsatmagan boʻlsa: millatni uygʻotishga va milliy ozodlikka chaqiruvchi sheʼrlarini deysizmi, teatr sohasidagi faoliyatini hamda dramatik asarlarini sanaysizmi, yangi avlod tarbiyasiga bagʻishlangan pedagogik asarlarini aytasizmi, milliy matbuotni oyoqqa turgʻizishdagi saʼy-harakatlari yoxud shu matbuot sahifalarida bosilgan publisistik maqolalarini olasizmi bularning barchasi bizga Abdulla Avloniy shaxsiyatini millat taraqqiyoti yoʻlida fidoyilarcha xizmat qilgan ulkan mutafakkir sifatida namoyon etadi. Ushbu risolada shoir ijodining mana shunday muhim qirralarini qamrab olishga harakat qilindi. Risola keng kitobxonlar ommasi uchun moʻljallangan.