"XIX asr Fransiya adabiyotining yirik vakili, Yevropa adabiyotida romantizm oqimi asoschilaridan biri Viktor Gyugo “Xoʻrlanganlar”, “93-yil”, “Parij avliyo bokirasi ibodatxonasi”, “Kulayotgan odam” kabi maʼlum va mashhur asarlarning muallifidir. Gyugo asarlaridagi har bir qahramon juda chuqur ijtimoiy-falsafiy mazmunni oʻziga singdirgan ramziy personajdir. XVIII–XIX asrlarda Fransiya va Yevropa siyosiy-ijtimoiy hayotidagi oʻta muhim voqealar hamda asarlaridagi qahramonlar taqdiri kesimida yozuvchi azaliy va abadiy qadriyatlar – oliyjanoblik, toʻgʻrilik, muhabbat va ularning aksi – hasad, kibr, sotqinlik toʻgʻrisida mahorat bilan hikoya qiladi."