Fransuz fantast yozuvchisi Jyul Vern oʻtgan asr oʻquvchilarining sevimli yozuvchisi hisoblanganiga shubha yoʻq. Oʻsmir borki, uning xayolotidan, yozganlaridan hayratlangan. Ishonarli tasvirlar, aql bovar qilmas kashfiyotlar oʻquvchini mulohazaga, tasavvur qilishga oʻrgatgan. Bugun, oradan qariyb bir asr vaqt oʻtib ham oʻquvchilar Jyul Vern asarlariga ehtiyoj sezadi. Nega? Oyga sayohat qilish yoxud suv ostida qolishga hozirgi oʻquvchilar fantastika emas, real tasvir deb qarashlari sababdir, balki? Balki, Jyul Vern xayolotidan hayratlanish mutolaaga turtki boʻlayotgandir? Balki, qahramonlar psixologiyasi tasvirlarida oshkoralik kitobxonni jalb qilayotgandir?..