Oydin vodiy

Amerikalik mashhur yozuvchi Jek London (1876–1916) oz fursatli yozuvchilik faoliyati davomida qirqqa yaqin ajoyib asarlar yaratishga musharraf boʻlgan. Boshlangʻich maktabni tugatgan 14 yoshli Jek konserva fabrikasiga ishchi boʻlib yollangan. 1893-yilda ilk bor u Yaponiya sohillariga dengiz safariga oddiy matros boʻlib borgan. 1894-yilda ishsizlarning Vashingtonga koʻchishida qatnashgan, daydilarcha hayot tarzi uchun qamoqqa olingan, siyosiy harakatlarga qoʻshilgan. Keyinroq Kaliforniya universitetiga oʻqishga kiradi va koʻp oʻtmay oʻqishni tashlab ketishga majbur boʻladi. 1897-yilning bahorida Alyaskaga ishlashga ketadi va taqdir unga oltin oʻrniga oʻz qahramonlari bilan “uchrashish” baxtini tuhfa etadi. Alyaskadan qaytganidan soʻng ijodiy faoliyatga jiddiy kirishadi va 1899-yilda shimol haqidagi dastlabki hikoyalari, 1900-yilda esa ilk kitobi – “Boʻri bolasi” hikoyalar toʻplami chop etiladi. Uning “Dengiz boʻrisi”, “Martin Iden”, “Uch qalb” romanlari mashhur.