Pedro Paramo

Lotin Amerikasi adabiyotining buyuk namoyandalaridan biri Xuan Rulfoning yozuvchilik qismatiga havas qilsa arziydi. Bu sanʼatkorning hayoti va ijodi haqida yaratilgan asarlar u yozgan narsalardan bir necha hissa koʻp. Yozuvchi oʻzini qiynagan dardlarni bir qator hikoya va qissalarda aks ettiradi. Bu narsa, ayniqsa, “Pedro Paramo” qissasida oʻzining yorqin ifodasini topgan. Qissa aniq narsalar tasviri bilan boshlanib, sirli, xayoliy voqealarga omixta boʻlib ketadi. Menippiya janri jahon adabiyotining eng qadimiy va, afsuski, kamdan-kam sanʼatkor qoʻl urishga jurʼat etadigan mashaqqatli janrlaridan biridir. Xuan Rulfo menippiya janri talablaridan kelib chiqqan holda oʻlim orqali hayotiy voqealarni tahlil qiladi: soflik nima-yu yolgʻon nima, bu olamda qay bir ishimiz boqiy qoladi-yu qay biri bargi xazondek toʻzib ketadi, degan masalalar haqida fikr yuritadi.