Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmitaning 2024-yil 17-apreldagi 03–07/2084-raqamli xulosasi asosida tayyorlandi. Qarz masalasi azal-azaldan, doimiy ravishda kishilarning boshini qotirib kelayotgani masalalardan biri ekanligi hech birimizga sir emas. Bu masalada musulmon kishi oʻzini qanday tutishi lozimligi xususidagi hukmlarni keragicha oʻrganish har bir musulmon uchun juda ham zarurdir. Zotan, inson kim boʻlishidan qatʼi nazar, hayoti davomida qarz muomalasiga duch kelishi turgan gap: kimdir qarz oladi, kimdir qarz beradi. Qarz olgan ham, qarz bergan ham, qarzga guvoh boʻlgan ham bu ish boʻyicha mavjud sharʼiy taʼlimotlarni, qarzning shariatdagi hukmlarini bilishi lozim.