Mana endi ilmimizda, ishimizda zarpechaklar koʻpaydi. Zarpechakni koʻrgansiz. Bir yerga tushganini sezmay qolsangiz – tamom. Moʻr-malaxday koʻpayib, oʻsimliklarning tanasiga yopishib, shirasini soʻrib yotaveradi. Zarpechak oʻzi oʻralashgan koʻchatni bir enlik ham oʻstirmay, uning hisobiga oʻzi gurkirab oʻsadi. Zarpechakni yoʻqotay desangiz, avvalo uni koʻpaytirmasligingiz kerak ekan. Koʻpaytirgandan keyin undan qutulish qiyin. Yulib, yanchsangiz ham yana oʻsib chiqaveradi.