Atoqli shoir Mirtemirning “Surat” dostoni oʻzbek muhabbat sheʼriyati xazinasining eng toʻrida turgan asarlardan biri sanaladi. Lirik qissaning paydo boʻlishi tarixi shoirning 1932-yilda millatchilar bilan hamkorlikda ayblanib, qamalgan paytlarida yuz bergan achchiq voqea bilan bogʻliq. Mirtemir mahbuslikda yurgan chogʻida sevikli rafiqasi boshqa insonga turmushga chiqib ketgan. Yillar oʻtib, ana shu unutilmagan ishq dardi “Surat” dostonida oʻzining yorqin ifodasini topadi.