Suwıq tamshı

T.Qayıpbergenovtıń «Suwıq tamshı» povesti - liriko-psixologiyalıq janrda jazılǵan. Povesttiń bas qaharmanı - Kamal. Onıń ákesi Jamal urıstan aldın kolxozda esapshı bolıp islegen. Adamlardıń ústinen arza jazatuǵın kisi bolǵan. Urısqa ketip, dushpan tárepke ótip ketken. Bir sóz benen aytqanda dizertir, satqın. Usı daq bir ómir Kamaldıń júzine shirkew bolıp, onıń jámiyetke emin-erkin aralasıwına jol qoymaydı. Onı hám anasın adamlar «satqınnıń shańaraǵı» dep ayıplaydı. Sonlıqtan, olar qalaǵa kóship ketedi. Ziyada degen qızdıń úyinde kireyde turadı. Kamal satqınnıń balası degen ayıptan qutılıp, basın kóterip jasaw ushın tınbay háreket etedi. Etikshi bolıp isleydi. Armiyaǵa ketedi. Óziniń hadallıǵı, miynetkeshligi menen jámiyetten ózine ılayıq ornın tabadı. Hújdan azabınan qutıladı. Usı waqıyalardıń barlıǵı Kamaldıń kúndeligi arqalı ashıp beriledi. Povest óz waqtında keń jámiyetshilik tárepinen tereń qanaatlanıwshılıq penen kútip alınǵan. Házirde óziniń mıń-mıńlaǵan oqıwshılar auditoriyasına iye