Yozuvchi Nazar Eshonqulning “Tobut” hikoyasi chekka bir muzofotning olis shahrida yuz bergan sirli o‘limning sabablarini aniqlash uchun kelgan taftish guruhidagi arxitektor tili bilan bayon etiladi. Asar g‘ayri tabiiy o‘lim jumbog‘ini topishga bel bog‘lagan bosh qahramonning kuzatishlari, fikrlari va xulosalari negiziga qurilgan murakkab va ziddiyatli konstruksiyaga ega bo‘lib, unda dahriylik va shiorbozlik asosida tiklangan shahar-jamiyatning fojiali qismati mantiqiy yo‘l bilan ochib berilgan.